Na siteseni ni yalomatua, e rogoci e Viti raraba ka yaco sara yani ki Toga matanisiga, Samoa i Sisifo, ka vaka kina na yasa i Niusiladi e qara mai ki Viti.

Na Domoiviti duadua ga edau rogoci kina na i tukutuku kei na sere makawa eso era katoni ka maroroi tu ena noda valeniwalesi. E maroroya ka vakamareqeta na vosa vaka-Viti, na i tovo kei na i vakarau vakavanua vakakina na veivakauqeti me da kila ka kauwai talega ena nodra i tovo na veimata tamata eda sa bula veimaliwai tu e Viti.

Na siteseni duadua ga oqo na Domoiviti, dau kilai eliu na Radio Fiji One, e nona tiko ena gauna oqo na konitaraki ni kakaburaki vaka-Viti, na Public Service Broadcast, ka saumi mai na matanitu. Na i naki levu ni konitaraki oqo, sa i koya na kena saumi me rawa ni dasu rogoci e Viti, Rotuma/Rabe na veiporokaramu eso ena maroroya na noda vosa, i tovo kei na i vakavanua eda kilaitani kina.

E rua na porokaramu sa dede talega ena noda valeniwalesi, sa i koya na gauna ni vuli ena walesi, e vakarautaki mai na Minisitiri ni Vuli ni noda vanua kei na Lotu Kaburaki edau rogoci ena vosa vaka-Peritania ena 10am ena Sigatabu kei na vosa vaka-Viti ena 6:45pm ena yakavi talega ni Sigatabu.

Sa vakanuinui tu na Radio Fiji One se na Domoiviti, me sa na rawa ni vakadewataki ena mona livaliva oqo, eso na porokaramu taleitaki eso, me rawa ni ko ni vakaivotavota talega ena maqosa ni nodra taledi na vakailesilesi era sa tomana tikoga na cakacaka ni buli porokaramu kei na maroroi ni keda i tukutuku ena noda valeniwalesi.